Америкалик 17 ёшли ўқувчи қиз Жасмин Харрисон бирйўла 113 та университетга қабул қилинди. Агарда унга барча таълим муассасаларидан бериладиган стипендиялар жамланса, унинг миқдори 4,5 миллион долларни ташкил этган бўларди.

Tengrinews ёзишича, абитуриент Шимолий Каролинадаги мактабни юқори балл билан тугатмоқда. У барча олий таълим муассасаларига кириш учун зарур ҳужжатларни онаси ёрдамида кечалари билан тўлдириб чиққан. Баъзи университетларга ҳужжат топшириш камида 90 доллар экани эътиборга олинса, Харрисонлар оиласи анчагина ҳаражатга ҳам тушган. Аммо унинг билими панд  бермади. Бирйўла 113 университетдан уни талабаликка қабул қилишгани тўғрисида таклифнома олди. У ўта мураккаб танловни амалга оширди: Беннет коллежида чақалоқлар учун интенсив даволаш бўлими ҳамшираси йўналишида ўқишга қарор қилди.