Жажжи жуссасига ҳарбийча кийим ярашган, кўксида юртимиз байроғи акс этган ёрлиқ тақиб олган ўқувчилар саҳнага шахдам қадам ташлаб чиқиб келишди. Сўнг жўр бўлиб қўшиқ куйлашди.

Юнусобод туманидаги 17-умумий ўрта таълим мактабида 9 май — Хотира ва қадрлаш кунига бағишлаб ташкил этилган тадбирда ўқувчиларнинг ана шундай чиройли чиқишлари, Ватан ҳақидаги шеърлари, куй-қўшиқлари йиғилганларни тўлқинлантириб юборди.

— Тадбирни ўтказишдан мақсад, болаларимиз қалбида ватанпарварлик ҳиссини ошириш, тинчлигимизни қадрлашга ўргатишдир, — дейди мактаб директори Гулноз Мирбабаева. — Ўқувчилар ҳам бу тадбирга катта қизиқиш билан тайёрланишди.

Тадбирга ташриф буюрган уруш фахрийлари ва мактабнинг 1938 йилги битирувчилари ўқувчиларга ўз хотиралари, уруш даврида халқимиз бошдан кечирган кунлар ҳақида гапириб беришди.

— Мен машҳур раққоса Тамарахоним рақсини ижро этдим, — дейди рақси билан ҳаммани лол қилган 5-синф ўқувчиси Саида Жўраева. — Тадбирга келган боболаримиздан билдимки, уруш йилларида Тамарахоним ва унинг шогирдлари фронтдаги аскарлар орасида юриб, концертлар берган экан.

Ўз мухбиримиз