Кунлар исиши билан кўпчилик томорқа ишлари билан банд бўлиб, қўл ва оёқ парваришига деярли эътибор бермайди. Айниқса, товон ёрилиши баҳор ва ёз ойларида кўп учрайдиган ҳолатдир.

Товон ёрилганда унда катта-кичик, чуқур-саёз кўринишдаги ёриқлар пайдо бўлади. Юрганда, жисмоний меҳнат билан шуғулланганда кучли оғриқ сезилади. Кечаси ачишиб, гоҳо лўқиллаб оғрийди.

Товон ёрилишининг асосий сабаби — шахсий гигиена қоидаларига риоя қилмаслик. Шунингдек, ўзига ноқулай пойабзал кийиш, сувда (захда) кўп юриш, терининг  ҳаддан ташқари қуриб кетиши ҳам сабаб бўлиши мумкин. Бундай ҳолатнинг олдини олиш учун уй шароитида бир неча муолажа қилинса, яхши самара беради. 

 Ҳар куни ётишдан олдин оёқ яхшилаб ювилади ва ёғли ёхуд таркибида А дармондориси бўлган крем суртиб, терига сингиб кетгунча ишқаланади.

 Картошка майда тўғралиб ёки қирғичдан ўтказилиб, оёқ тагига бир неча соатга боғланади. Оёқ териси юмшагандан сўнг, картошка қолдиқлари ювилиб, озиқлантирувчи крем суртилади.

 Агар товонда енгил чизиқлар пайдо бўлса, уч-тўрт ҳафта давомида илиқ сувда оёқ ванна қилинади.