Инсон китоб мутолаа қилиб турсагина фикри теранлашиб, дунёқараши кенгайиб бораверади. «Тасвирий ойна» ижодий уюшмаси 2018 йил номига ҳамоҳанг тарзда «Фаол тадбиркорлик, инновацион ғоялар ва технологиялар — келажак пойдевори» деб номланган қўлланмани кенг омма ҳукмига ҳавола этди. Миллий матбуот марказида мазкур китобнинг тақдимоти бўлиб ўтди.

Мазкур қўлланма саҳифаларидан Президентимиз Шавкат Мирзиёевнинг маъруза ва нутқларидан олинган қайдлар, инновацион ғоялар ва технологияларга оид матнлар, донишмандларнинг ҳикматли сўзлари, мақоллар, шеърий мисралар, фаол тадбиркорлик, инсон манфаатларини улуғлаш, она Ватанни ҳимоя қилиш, мустақилликни мустаҳкамлаш, соғлиқни сақлаш, жиноятчиликка қарши курашиш, қишлоқ хўжалигини ривожлантириш, маънавий қадриятларни эъзозлашга чақирувчи қайду ҳикматлар ўрин олган. Китобни мутолаа қилиш чоғида сўз латофати сизни сеҳрлайди, мафтун этади. Ундаги сон-саноқсиз зиё нурларидан кўнгиллар ёришади. Аслида тўпламдаги ҳикматли сўзлар бизнинг ­кўнгил уйимизни мунаввар этиб, юрган йўлларимизни чароғон қилиши турган гап.

Шу ўринда кичкина бир мулоҳаза. Чекка туманлардаги айрим кўчалардаги баннерларга сўзлар хато ёзилмоқда. Масалан, бир гал хизмат сафарида бўлганимда Мирзачўл тумани марказидаги каттагина баннердаги ўн иккита имло хатога кўзим тушди. Ахир, бундай нотўғри кўчирилган сўзлар қанчадан-қанча одамнинг фикрини салбий томонга ўзгартиради, хатога кўз ўрганади. Шундай экан, бундай ҳолатларни «Тасвирий ойна» ижодий уюшмаси мутасаддилари тез орада бартараф этишса, айни муддао бўлар эди.

Хуллас, ўттиз минг нусхада чоп этилган мазкур китобни ўқиган кишининг кўнгил оламида офтоб чақнаши аниқ. Бундай нур маънавиятга, маърифатга абадул-абад хизмат қилади.

Улуғбек ЖУМАЕВ,

«Оила даврасида» мухбири