Баҳор элчилари бўй чўзиши билан бувижоним дарров отқулоқ териб келишимни айтарди. Отқулоқнинг 2-3 та баргини муздек сувда чайиб, кейин пешонасига қўярди. Бу бош оғриғидан халос бўлишда ёрдам берар экан.

Шунингдек, отқулоқ қон босими кўтарилганда ҳамда меъда хасталикларида тавсия этилади. Тана ҳарорати ошганда эса малҳам сифатида қўйилса, танадаги иссиқликни олади.

Отқулоқ илдизидан, баргидан тайёрланган қайнатма дамлама дори сифатида ичдан қон кетиш (дизентерия, ичак яраси) ва ич кетишини тўхтатиш учун ишлатилади.

Овқатларга ноёб таъм қўшиш билан бирга, таркибидаги А, С, Б6, оқсил, темир, магний ва фойдали органик бирикмалар  кўкламдаги  «илик узилди»да  дармон бўлади. Бундан ташқари, отқулоқ юрак қон-томир тизимини мувозанатга келтириб,  стресснинг олдини олади. А витаминига бой бўлгани учун кўзни равшанлаштиради, кальций ва калий моддалари эса терига ижобий таъсир кўрсатиб, у билан боғлиқ касалликларда қўлланилади.

Отқулоқдан ҳомиладор аёллар камроқ истеъмол қилганлари маъқул.

Дилфуза ТИЛЛАЕВА

 тайёрлади.