Баъзан нафас олаётганимда юрагим санчиб қолади. Оғриқ ўтиб кетгунича қисқа-қисқа нафас оламан. Бу ҳолат бир ҳафта сурункали давом этади. Баъзан бир ойдан кейин яна қайталанади. Аслида бу қандай касаллик?

Фарида ИБРОҲИМОВА,

Фарғона вилояти

— Юракдаги санчиқ юрак касалланганида, стенокардия, шамоллаш, ревматологик хасталикларда пайдо бўлади, — дейди Учтепа тумани 26-оилавий поликлиниканинг олий тоифали кардиологи Барно ­МИРЗАҲМЕДОВА. — Неврозда, кўкрак қафаси, қовурғалар шамоллаши, ошқозон ва ичак касалланганида эса оғриқ юрак ва курак атрофида сезилади.

Юракдаги оғриқ икки асосий гуруҳга бўлинади:

Ангиноз оғриқлар — ҳаяжонланганда, жисмоний зўриқишда, қон оқимининг кучайишида юзага келади. Бундай ҳолатда шифокор билан маслаҳатлашиш тавсия қилинади.

Ишемик оғриқлар — сиқилувчан, қисувчан бўлиб, одатда, кўкрак орқасида, ўнг елкада, қўлда, курак тагида ва жағнинг пастки қисмида кузатилади. Оғриқ кучли нафас қисиши билан кечади. Кўкрак орқасида ёки чап тарафида пайдо бўлган оғриқ — ўткир миокард инфарктидан далолат беради.

Юрак ревматологик хасталанганда, юрак пардаси шамоллаганида юзага келган оғриқ узоқ, санчиқли, зирқиратувчи бўлади ва кўкракдан чапроқда пайдо бўлиб, йўталганда ва нафас олганда зўраяди.

Агар юрак атрофидаги оғриқ тана эгилганда ёки бурилганда, чуқур нафас олганда, нафас чиқарганда, қўллар ҳаракатланганда пайдо бўлса, бу радикулит ёки қовурғалардаги хасталик бўлиши ҳам мумкин.

Руҳий зўриқиш, руҳий тушкунликда оғриқ бўйин ва елкада бўлади. Шунда баъзилар «юрагим оғрияти», деб кардиологга мурожаат қилади. Бундай пайтда  беморни тинчлантириб, бошқа мутахассисга кўриниши лозимлигини уқтириш керак. Оч қолганда ёки овқат еганда оғриқ бўлса, бу ошқозон ёки ошқозон ости бези касаллигининг белгиси бўлиши мумкин. Оғриқнинг сабаби умуртқа поғонасининг кўкрак қафаси касаллиги ёки остеохондроз ҳам бўлиши мумкин.

Лола ВАЛИЕВА

ёзиб олди.