2017 йил нимаси билан эсда қолди? Қандай воқеалар дунё оммаси назарида бўлди? Кўплаб халқаро ахборот-таҳлил институтлари бу борада ўз версияларини эълон қилди. Улар орасида инсониятни эзгуликка чорловчи ҳодисаларни саралаб, эътиборингизга ҳавола қилишни лозим топдик.

Цюрих шаҳрида дунёдаги илк «дарахт» вазифасини бажарувчи завод ишга тушди. У йилига атмосферадаги 900 тонна карбонат ангидридни кислородга айлантириб беради. Технологик жараёнда вужудга келган иссиқлик энергияси иссиқхоналарни иситишда, карбонат ангидриддан эса ёқилғи сифатида саноатда фойдаланилади.

Германияда илк марта аёллар ва эркаклар ойлик маошларининг тенглигини таъминловчи қонун кучга кирди. Қонун бир хил ишни бажарувчи аёл ва эркакларнинг иш ҳақи тенглаштирилиши ҳамда уларнинг камситилишига йўл қўйилмаслигини кўзда тутади.

Янги Зеландиянинг Окленд шаҳрида бўлиб ўтган спорт мусобақасида 101 ёшли ҳиндистонлик спортчи Ман Каур 100 метр масофани 14 сония ичида югуриб ўтди. У профессионал спорт билан 93 ёшидан бошлаб жиддий шуғуллана бошлаган.

Мисрлик хаттот Саъд Муҳаммад кўчирган Қуръони каримнинг улкан нусхаси «Гиннесснинг рекордлар китоби»дан ўрин олди. Хаттот 3 йил давомида 700 метрли қоғоз ўрамига Қуръони карим оятларини битиб чиқди.

Дубайда биринчи робот-полициячи фаолиятини бошлади. У ҳозирча жамоат жойларида полиция патрули вазифасини бажармоқда. Робот шунингдек, суҳбатдошининг юз ифодасидан, унинг ҳис-туйғуларини ҳам таҳлил «ўқий» олади.

Ҳиндистонда Ганг ва Ямуна дарёлари тирик жонзотлар, деб эълон қилинди. Дарёларга юридик шахс мақоми берилиб, ҳуқуқлари, бурчи ва мажбуриятлари белгиланди. Шу тариқа энди бу дарёларнинг ифлосланиши тирик жонзотга етказилган жисмоний, моддий ва маънавий зарарга тенглаштирилади.

Анталияда маиший чиқиндидан электр токи ишлаб чиқарувчи иссиқлик электр станцияси барпо этилди. Унинг ишлаб чиқариш қуввати 25 мегаваттни ташкил қилади. Улкан сайёҳлик оқимига эга Анталиянинг ИЭС ишга тушиши билан маиший чиқиндилардан буткул тозаланишига эришиши кутилмоқда.

Сингапурда қоронғида ёруғлик таратувчи 400 метр йўл ишга туширилди. У кундузи қуёш нурини ютиб, кечаси ўзини-ўзи ёритиб туради.

Вашингтондаги хусусий мактаблардан бирининг директори ёзги таътилни бутунлай телефон, смартфон ва интернетсиз ўтказган ўқувчига 100 доллар пул мукофоти ваъда қилди. Бундан аввал у мактабида ҳафтада бир кун — сешанба кунини ўқувчилар учун замонавий гаджетсиз кун, деб эълон қилганди.

Польшадаги Краков технология университети талаба қизлари узун сочларини кесиб хайрия тадбири ўтказди. Уларнинг сочлари кимётерапия олган қизалоқларга соч-париклар тайёрлаш учун корхоналарга топширилди.

Тувада 4 ёшли қизча инфарктни бошдан ўтказган бувисига тез ёрдам чақириш учун қорли ўрмон орқали 8 километр масофани босиб ўтди. Қизалоқнинг кимсасиз тайгада, 34 даража аёзда 4 соатдан ортиқ йўл босиши ҳақиқий мўъжизадир.

Хитойлик йигит суюклисида илиқ таассурот уйғотиш учун унга 33 тонна келадиган метеорит бўлагини совға қилди. У улкан харсангни уй учун йиғиб юрган 1 миллион юань пулига (160 минг доллар) сотиб олган.