аввало оилада аланга олсин

Мактабгача ёшдаги болаларни кузатсак, китобни ўзгача меҳр ва иштиёқ билан варақлайди. Уларнинг назарида бутун дунёнинг сир-синоати китобга жам бўлгандек туюлади. Суратларини томоша қилиб, ҳайратланади. Фарзандимизнинг қалбидаги бу учқуннинг кучлироқ аланга олиши, йўлларимизнинг нурафшон бўлиши эса ўз қўлимизда. 

Ишдан қайтаётиб ота ёки она қачонки, оиласи учун иккита ноннинг ёнига битта китоб қўшиб кўтариб борса, мақсадимиз сари одимлашни бошлаган бўламиз. Қолаверса, гўдак қалбидаги китобга туғма интилишни кутубхоналарда ҳам юксалтириш зарур. Китоб — катталар ва болалар мулоқоти учун ажойиб воситачи. Ҳамкорликдаги китобхонлик оила аъзоларни бир-бирига яқинлаштиради. Биргаликдаги завқли мутолаа боланинг маънавиятини тарбиялайди. 

Шу мақсадда «Bilim» ахборот-кутубхона маркази мутахассислари болалар ва ота-оналар билан ҳамкорликни ташкил қилишга алоҳида эътибор қаратмоқда. Марказ ходимлари китобхонликни кенгроқ тарғиб қилиш мақсадида, «Мобиль кутубхона» лойиҳаси ёрдамида ногирон ва кекса ёшдаги китобхонларга уйида хизмат кўрсатишни ўз олдига мақсад қилиб қўйган. Бу билан улар оила даврасида ҳуқуқий, илмий-оммабоп, бадиий адабиётлар, маданий-маърифий манбалар ва даврий матбуот нашрларини ўқиш имкониятига эга бўлади.

Айни кунларда кутубхонада «Оилавий китобхонлик — авлодлар алоқаси» акцияси, акция доирасида «Отам, онам ва мен — оилавий китобхонмиз!» фототанлови ўтказилмоқда. 2017 йил охирида якунланадиган танлов ғолибларини эсдалик совғалар кутяпти.

Оилада мутолаа муҳити ҳукмрон бўлса, фарзандлар ҳам бу қимматли машғулотнинг завқини ҳис қилиб улғаяди. Зеро, бешикдан то қабргача илм изла, деб бекорга айтилмаган.

Нодира НАСИМОВА,

«Bilim» ахборот-кутубхона маркази кутубхоначиси