— Сочлар парвариш қилиниб, тез-тез озиқлантирилмаса, жилосини йўқотиб, ўсиши ҳам секинлашади, — дейди «Каприз» салони косметологи Шаҳноза АЛЛАЕВА.

  — Жуда секин ўсадиган соч эгалари учун айрим чоралар тавсия этилади.

Аввало, сочнинг ўсиш тезлиги уларни қуритиш жараёнига боғлиқ. Бунинг учун сочни ювгандан сўнг 15 дақиқа юмшоқ сочиққа ўраб қўйиш, сўнг хона ҳароратида қуритиш керак.

Шунингдек, ҳар куни бош терисини бармоқ ёки юмшоқ чўтка ёрдамида енгил уқалаш теридаги моддалар алмашинувини яхшилашга ёрдам беради.

Сочларни тўғнағич, қисқич ва бошқа воситалар билан қаттиқ сиқиб, таранг турмакламаслик керак. Тортилиш оқибатида соч илдизи кучсизланиб, тўкила бошлайди.

Бундан ташқари, ҳафтада икки марта ниқобли муолажа тавсия этилади. Ниқоб ёғли қатиқ, тухум сариғи, таркибида А, Е дармондорилари бўлган майдаланган қора нон, алоэ шарбати, асал, репейник (чакамуғ) мойи ва хантал аралашмасидан тайёрланади.

Сочлар ҳар доим мустаҳкам ва гўзал бўлиши учун албатта сифатли овқатланиш керак. Қизил гўшт, балиқ, тухум, ҳайвон ва ўсимлик ёғи, сабзавот ва кўкатлар соч ўстирувчи моддаларга бой.

Шаҳноза РАЖАБОВА

ёзиб олди.