Президентимиз Шавкат Мирзиёевнинг 2017 йил 12 январдаги «Китоб маҳсулотларини чоп этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғибот қилиш бўйича комиссия тузиш тўғрисида»ги фармойишида белгиланган вазифалар ижросини таъминлаш мақсадида бир қатор ижодий ишлар амалга оширилмоқда.

«Bilim» ахборот кутубхона маркази (АКМ) Тошкент давлат техника университети қошидаги Чилонзор академик лицейи билан ҳамкорликда ёшларни илм олишга йўналтириш, ақлий салоҳиятини юксалтириш, китобга қизиқишини янада ошириш мақсадида кўчма кутубхона ташкил этиб, мамлакатимиздаги кўзга кўринган истеъдодли ижодкорлар билан давра суҳбатлари уюштириб келмоқда. Навбатдаги давра суҳбати замонамизнинг моҳир адибларидан бири — Ўзбекистон халқ ёзувчиси Тоҳир Малик билан бўлди.

Тадбирда ёзувчи ёшлар билан самимий мулоқот қилди, инсон умри давомида ўзидан яхши ном қолдириши учун, албатта, илмга эга бўлиши шартлигини айтди. Бунга эса, фақатгина китоб орқали эришилади. Адибнинг таъкидлашича, дунёда одам бир-бирига ҳақиқий дўст бўлмаслиги мумкин, лекин китоб чин дўст бўла олади.

Суҳбат давомида ўқувчилар ёзувчининг асарларидан парчалар айтиб, ўзларини қизиқтирган саволларга жавоб олди. Тадбир якунида «Bilim» АКМ ходимлари ташкил этган кўчма кутубхона китобларига библиографик шарҳлар берилди.

Зилола ИКРОМЖОНОВА,        

«Bilim» ахборот кутубхона маркази ходими