«Гулшан» маҳалласи Қарши шаҳридаги намунали маҳаллалардан бири. Яқинда маҳалла фуқаролар йиғинининг янги биноси фойдаланишга топширилди.

Кўримсиз ва эски бино ўрнида Қарши шаҳридаги «Бинокор дизайн» масъулияти чекланган жамияти қурувчилари томонидан барпо этилган замонавий маҳалла идорасида барча шароит яратилди. Маҳалла раиси, котиб, маслаҳатчилар, профилактика инспектори учун алоҳида хоналар ажратилиб, компьютер жамланмаси, зарур мебель жиҳозлари ва тегишли адабиётлар билан таъминланди. Бинодан муҳташам мажлислар зали ва Халқ қабулхонаси ҳам жой олган.

Уч мингдан зиёд аҳоли истиқомат қилаётган маҳалла ҳудудида «Бинокор» спорт клуби, бир неча маиший хизмат кўрсатиш ва савдо шохобчалари, гўзаллик салони, чойхона фаолият юритмоқда. Абу Убайда ибн Ал-Жарроҳ зиёратгоҳи ҳам маҳалла ҳудудида жойлашган.

— Маҳалла аҳлининг бугунги кунидан кўнгли тўқ, эртанги кунга ишончи мустаҳкам, — дейди «Гулшан» маҳалла фуқаролар йиғини раиси Ўктам Ўроқов. — Боиси хонадонлар газ, электр энергияси ва ичимлик суви билан тўлиқ таъминланган. Кўчалар обод, саранжом-саришта. Маҳалла фаоллари кам таъминланган, ногирон ва кексалар ҳолидан мунтазам хабар олиб, ҳомийлик ёрдами кўрсатади. Шаҳардаги кенг кўламли бунёдкорлик ишлари натижасида ҳудудимизда ўтган йили саккизта кўп қаватли уй барпо этилди. Бу юртимизда аҳоли фаровонлигини юксалтиришга қаратилаётган юксак эътибор самарасидир.

Ўлмас БАРОТОВ,

ЎзА