«Китоб олами»нинг яна бир туҳфаси

«Шаҳримизда янги китоб мажмуаси очилганини эшитиб, фарзандларим билан дарров ўша ерга ошиқдим.

Тўғриси, ёнгинамизда шундай катта китоб мажмуаси иш бошлайди, деб ўйламаган эдим. Илгари бундай китоб мажмуалари фақат пойтахтда бўларди-да. Энди эса ўша китоблар шундоққина олдимизга келиб турибди. Айниқса, болаларнинг қувончини айтмайсизми?..»

Бу андижонлик Салимахон Ғаффорованинг Андижон шаҳрида яқинда иш бошлаган «Китоб олами» маънавий-маърифий савдо мажмуаси ҳақидаги мулоҳазалари. Ҳа, китобнинг китобхонлар ҳузуригача етиб бориши фақат қулайлик яратишгина эмас, том маънода маънавий юксалиш аломати ҳамдир.    

Андижон шаҳридаги «Баркамол авлод» вилоят болалар ижодиёти марказида «Kитоб олами» маънавий-маърифий савдо мажмуасининг очилиши «Адабиётга эътибор — маънавиятга, келажакка эътибор» шиори остида оилавий китоб байрамига уланиб кетди. Вилоят ҳокимлиги, Республика Маънавият тарғибот маркази, «Kитоб олами» маънавий-маърифий савдо мажмуаси ҳамда «Ўздавкитобсавдотаъминот» масъулияти чекланган жамияти ҳамкорлигида ўтказилган байрамда китобхонлар эътиборига юздан ортиқ нашриёт ва муаллифларнинг минг номдаги етмиш  мингга яқин китоблари ҳавола этилди.

«Турли йўналиш ва мавзуларда тақдим этилаётган китоблар ўзининг сифати, нархининг арзонлиги билан эътиборимни тортди, — дейди Андижон давлат тиббиёт институти талабаси Зуҳриддин Шодмонов. — Қолаверса, ярмаркада анчадан буён қидириб юрган китобларимни топдим».

Бу ерда тўловни исталган шаклда амалга ошириш имкони яратилгани харидорларга айниқса манзур бўлди. Шунингдек, китоб байрами доирасида «Ўзбеккино» миллий агентлиги ижодкорлари «Тўмарис» спектаклини намойиш этишди. Спектаклдан сўнг янги китоблар тарғиботи ҳамда китобхонлар билан юзма-юз мулоқот ташкил қилинди.

Аҳоли ўртасида бадиий жиҳатдан юксак миллий ва жаҳон адабиёти намояндаларининг жавоҳирларини тарғиб этиш борасида ташкил этилган китоб байрами бир ҳафта давом этди.

 Сайёра ҚОСИМОВА