Юз териси жуда таъсирчан бўлгани сабабли доим парваришни талаб этади. Терини озиқлантириш ва намлантириб туришдан ташқари, уни машқ қилдириб туриш ҳам даркор. Чунки юз машқи қон айланишини яхшилайди, тери ва мушакларнинг таранглашишига ёрдам беради. Юзим чиройли бўлсин десангиз, қуйидаги машқларни бажаринг:

Биринчи машқ: қўллар икки ёндан юқорига кўтарилади, айни вақтда тишни тишга босиб туриб, оғиздан нафас олинади. Сўнг қўллар туширилади ва лабларни жуфтлаб, оғиздан нафас чиқарилади.

Иккинчи машқ: қўллар белга қўйилади. Бошни чапга бура туриб, оғизнинг чап бурчагидан нафас олинади. Бошни аввалги ҳолатига қайтара туриб, оғизнинг ўнг бурчагидан нафас чиқарилади.

Учинчи машқ: қўллар белга қўйилади. Қўл кафтини ичкарига қилиб, юқорига кўтарилган ҳолда гавда 90 даражага ўнгга бурилади. Қўлларга қаралади, бурун орқали нафас олинади, лунжни тўлдириб, оғиздан нафас чиқарилади.

Тўртинчи машқ: кўзни қаттиқ юмиб, бурундан нафас олинади, лабларни жуфтлаб оғиздан нафас чиқарилади.

Бешинчи машқ: қўллар белда. Оёқлар елка кенглигида. Гавда орқага энгаштирилади, қўллар икки ёнга узатилади, пастки жағни кўтариб, нафас олинади ва чиқарилади.

Олтинчи машқ: гавда бешинчи машқдагидек тутилади. Нафас олиш вақтида пастки жағ чапга ёки ўнгга сурилади, нафас чиқариш пайтида эса аввалги ҳолга келтирилади.

Еттинчи машқ: тишни тишга қўйиб, нафас олинади, оғиз икки ёнга очилади ва жағни пастга тушириб, нафас чиқарилади.

Ҳар бир машқ кунига 3-4 марта такрорланади. Машқларни бажаришга эринманг ва улар кун тартибингиздан жой олса, албатта, гўзаллик ва соғлиқ учун фойдадан холи бўлмайди.

Гўзал СОЛИЕВА

тайёрлади.