Пойтахтда ҳаво сифатини яхшилаш учун янги экологик ечим қўлланилмоқда. Тошкентнинг саккиз маҳалласида сунъий кўллар ташкил этилади. Хўш, бу ташаббус шаҳар ҳавосига қанчалик таъсир кўрсатади?
Экология ва иқлим ўзгариши миллий қўмитаси маълумотига кўра, «Тоза ҳаво» умуммиллий лойиҳаси доирасида Чилонзор, Сергели, Юнусобод, Миробод, Шайхонтоҳур, Учтепа ва Олмазор туманларидаги саккизта маҳаллада сунъий кўллар барпо этиш ишлари олиб борилмоқда.
Маълумки, Тошкентда ҳавонинг чанг билан ифлосланиши, ёз ойларида ҳароратнинг юқорилиги ва яшил ҳудудларни кўпайтириш зарурати долзарб экологик масалалардан. Сунъий кўллар ана шу муаммоларни юмшатишга хизмат қилиши мумкин.
Аслида, катта шаҳарларда сув ҳавзаларини кўпайтириш янгилик эмас. Масалан, Жанубий Корея пойтахти Сеулда Чхонгечхон сув оқими қайта тикланиб, атрофида яшил ҳудудлар ташкил этилган. Илгари бетон конструкциялар билан қопланган бу ҳудуд бугун шаҳар аҳолисининг севимли сайр масканларидан бирига айланган. Тадқиқотларда ушбу ҳудуд атрофида ҳароратнинг пасайиши ҳам кузатилган.
Сингапурда ҳам шунга ўхшаш тажриба бор. Бишан-Анг Мо Кио боғида оддий бетон канал табиий дарё ўзанига айлантирилган. Натижада нафақат яшил ҳудуд кенгайган, балки қушлар ва бошқа жонзотлар учун ҳам қулай яшаш муҳити пайдо бўлган.
Сунъий кўллар Тошкентга нима беради?
Гап шундаки, сув ҳавзалари атрофдаги ҳавонинг намлигини ошириб, айниқса иссиқ кунларда маҳаллий ҳароратни бироз юмшатиши мумкин. Кўл атрофига дарахтлар экилса, соя-салқин жойлар кўпаяди. Яшиллик эса чангнинг бир қисмини ушлаб қолишга ёрдам беради. Шу тариқа сув ва дарахтзорлар биргаликда маҳалла микроиқлимига ижобий таъсир кўрсатади.
Албатта, битта кўл бутун шаҳар ҳавосини ўзгартириб юбормайди. Бироқ бундай ҳудудлар кўпайиши шаҳарнинг айрим қисмларида яшаш шароитини яхшилаши мумкин. Қолаверса, сув ҳавзалари атрофида аҳоли сайр қиладиган, дам оладиган яшил масканлар пайдо бўлади.
Ҳозирча лойиҳа доирасида Чилонзордаги «Бешёғоч», Сергелидаги «Хонободтепа» ва «Қумариқ», Юнусободдаги «Боғибўстон», Мирободдаги «Юксалиш», Шайхонтоҳурдаги «Ипакчилик», Учтепадаги «Қўрғонтепа» ҳамда Олмазордаги «Замондош» маҳаллалари танланган.
Муҳими, бу ташаббус сув ҳавзаларини шаҳарнинг яшил инфратузилмаси билан бирга ривожлантиришга қаратилган. Хориж тажрибаси ҳам сув ва яшиллик уйғунлиги маҳаллий микроиқлимни яхшилашда фойдали бўлиши мумкинлигини кўрсатади.
Тошкентдаги саккизта маҳаллада бошланган ишлар ҳам шу йўналишдаги амалий қадамлардан бири бўлади.
Ўз мухбиримиз
Пойтахтнинг 8 та маҳалласида сунъий кўллар ташкил этилади
🕔10:53, 20.11.2026
✔40
Пойтахтда ҳаво сифатини яхшилаш учун янги экологик ечим қўлланилмоқда. Тошкентнинг саккиз маҳалласида сунъий кўллар ташкил этилади. Хўш, бу ташаббус шаҳар ҳавосига қанчалик таъсир кўрсатади?
Батафсил
Суғориладиган Ерларнинг ярми шўрланган
🕔15:31, 12.11.2026
✔94
Ўзбекистонда суғориладиган ерларнинг қарийб ярми шўрланишга учраган. Экинларни суғориш учун олинадиган сувнинг 37 фоизи эса каналларда йўқотилмоқда. Бу Иқтисодий тадқиқотлар ва ислоҳотлар маркази томонидан ўтказилган илмий тадқиқотда қайд этилди.
Батафсил
Қурғоқчилик ва ўзбошимчалик миллий табиат боғига хавф туғдирмоқда
🕔14:47, 05.11.2026
✔128
Зарафшон миллий табиат боғи – Зарафшон дарёси водийсидаги ноёб тўқай экотизимлари, ўсимлик ва ҳайвонот дунёсининг биологик хилма-хиллигини сақлашга хизмат қиладиган муҳофаза этиладиган табиий ҳудуд.
Батафсил