«Яшил макон» умуммиллий ло­йиҳаси доирасида кўчат экиш билан бирга, уларни парваришлаш ва асраб-авайлашга алоҳида эътибор қаратилмоқда.

Айниқса, иссиқ ва қуруқ иқлимли Бухоро вилоятида маҳаллий шароитга мос кўчатларни етиштириш муҳим аҳамиятга эга.

Қоракўл тумани давлат ўрмон хўжалигида 18 гектардан ортиқ майдонда кўчатхона ташкил этилган бўлиб, унда 30 дан ортиқ турдаги мева ва манзарали дарахт кўчатлари парвариш қилинмоқда. Жумладан, ўрик, шафтоли, узум, тут, қайрағоч, жийда, терак, павлония, қарағай, шумтол, заранг ва бошқа дарахт турлари етиштирилмоқда.

Экологик партия вакиллари ҳамда маҳаллий Кенгаш депутатлари томонидан кўчатхона фаолияти ўрганилди. Маълум бўлишича, хўжаликда 3 миллиондан зиёд мевали ва манзарали кўчатлар етиштирилган бўлиб, мавсумий эҳтиёжни таъминлаш учун етарли захира шакллантирилган.

Умуман, Бухоро вилояти ўрмон хўжаликлари томонидан «Яшил макон» лойиҳасининг кузги мавсуми учун 20 миллион дона кўчат захираси тайёрланган. Бу ишлар ҳудудларни кўкаламзорлаштириш, экологик барқарорликни таъминлаш ва келажак авлод учун муносиб яшил муҳит яратишга хизмат қилади.