Тозаликни бир кунлик тадбир эмас, кундалик одат билан таъминлаш мумкин. Аммо бундай акциялар жамоатчилик эътиборини атроф-муҳит мусаффолигига қаратиш, одамларни умумий мақсад атрофида бирлаштиришда муҳим аҳамиятга эга.

19 сентябрь – Бутунжаҳон тозалик куни муносабати билан ўтказилган «Яшил шанба» акция­си доирасида Андижон вилоятида ҳам ана шундай амалий тадбир ташкил этилди.

Янги Андижон массивида ўтказилган плоггинг акцияси Ўзбекистон Экологик партияси Андижон вилоят кенгаши, вилоят экология бошқармаси ҳамда бошқа мутасадди ташкилотлар ҳамкорлигида ташкил этилди. Унда «Ёш экологлар» қаноти аъзолари, «Экология ва саломатлик» аёллар клуби вакиллари, партия фаоллари ҳамда жамоатчилик вакиллари иштирок этди.

Плоггинг давомида иштирокчилар белгиланган ҳудуд бўйлаб юриб, атрофга ташлаб кетилган маиший чиқиндиларни йиғиб, Янги Андижон массиви озодалигига ҳисса қўшишди.

Тадбирда иштирокчиларга атроф-муҳитни асраш, чиқиндиларни белгиланган жойларга ташлаш, жамоат жойларида тозаликни сақлаш ва экологик маданиятни оширишнинг аҳамияти ҳақида тушунтиришлар берилди. Фаол иштирок этган бир гуруҳ фаолларга ташаккурнома ва эсдалик совғалари топширилди.