Аномал иссиқда дарахт ва бута кўчатларини, шунингдек, бошқа ўсимликларни тўғри вақтда суғориш уларни иссиқ стрессидан ҳимоя қилади, намликни сақлайди ва соғлом ўсишини таъминлайди.

Кечки соат 20:00 дан эрталабки 5:00 гача суғориш энг мақбул вақт ҳисобланади. Бу вақтда ҳаво салқин бўлади, сув камроқ буғланади ва тупроқ намлиги узоқроқ сақланади. Шунингдек, бу вақтда суғориш илдизларнинг чуқур ўсишига ёрдам беради ва ўсимликнинг чидамлилигини оширади.

Суғориш тартиби қандай?

Эндигина экилган кўчатлар – соат 20:00-22:00 оралиғида камроқ, лекин тез-тез суғорилади.

Ёш дарахтлар – соат 20:00-22:00 оралиғида ҳафтасига 2-3 марта чуқур ва мўл сув билан суғорилади.

Катта дарахтлар – соат 20:00-5:00 оралиғида ҳафтасига 1-2 марта чуқур ва мўл суғорилади.

Муҳим тавсиялар

1. Сувни баргларга эмас, илдиз қисмига қуйинг. Бу сувнинг буғланиб кетишини камайтиради.

2. Сувни секин ва чуқур қуйинг, шунда у илдизларга етиб боради.

3. Мулча қўлланг. Бу намликни узоқроқ сақлайди ва илдизларни ҳимоя қилади.

4. Соат 10:00 дан 17:00 гача суғорманг. Бу вақтда сув тез буғланади ва кўчат ҳамда ўсимликка зарар етказиши мумкин.

5. Доимий ва меъёрида суғориш ўсимликни иссиқдан ҳимоя қилади.

Эслатма: ҳар бир ўсимлик ва тупроқ турининг сувга бўлган эҳтиёжи турлича. Шунинг учун тупроқ намлигини текшириб, ўсимлик эҳтиёжига қараб суғориш тавсия этилади.

Экология қўмитаси матбуот хизмати