Бухородаги «Бухоро бриллиант силк» Ўзбекистон — Хитой қўшма корхонасида пиллани қайта ишлаб, мато тайёрлаш йўлга қўйилди.

Ушбу лойиҳани амалга ошириш учун 2 миллион доллардан зиёд маблағ сарфланди. Замонавий технологик ускуналар билан жиҳозланган цехда ипак толасидан турли ўлчамдаги матолар тўқилаётир. Матолар замонавий принтерли гул босиш дастгоҳида камалакранг атлас ва адрас тусини олади. Принтерда босиладиган гулларнинг ўзига хослиги шундаки,  ранги униқмайди, сув ва қуёш нурига чидамли. Ипак матолар экологик тоза, ҳар қандай иқлимга мос. Бу матолар ҳозирча ички бозорга, буюртма асосида Фарғона, Самарқанд, Хоразм вилоятлари ва Тошкент шаҳридаги харидорларга етказиб берилмоқда. Қўшма корхонанинг ипак толалари хорижда ҳам харидоргир. Ўтган йили корхона Эрон, Вьетнам, Туркия, Ҳиндистон мамлакатларига 2 миллион долларлик маҳсулот экспорт қилган.