Ҳудудлардаги йирик иқтисодий ва маданий объектлар фаолиятини тиклаш ҳамда яхшилаш борасида ҳам амалий натижаларга эришилмоқда.

Экологик партия раҳбари А.Ҳамзаев ва депутат О.Раҳимов Олот туманидаги, деярли олтмиш йилдан буён Бухоро ва Навоий вилоятлари сув таъминотида муҳим ўрин тутиб келган Аму-Бухоро биринчи насос станцияси фаолиятини ўрганишди. Осиё тараққиёт банкининг 83 млн АҚШ доллари миқдоридаги маблағи ҳисобидан Хитойнинг CNTIC компанияси томонидан тўлиқ реконструкция қилинган ушбу станция эндиликда замонавий, энергия тежамкор ва юқори самарадорлик билан ишламоқда.

Андижон вилоятининг Избоскан туманида эса кўпдан буён ечимини кутаётган масала депутат Наврўзбек Юсупов аралашуви билан ижобий ҳал этилди. Депутат Тараққиёт маҳалласида жойлашган ва 2020 йилдан буён қурилиши тўхтаб қолган Оқмозор ота зиёратгоҳидаги ҳолатни ўрганиб, масъул ташкилотлар олдига муаммони қўйган эди. Натижада, депутатлик назоратидан сўнг мазкур маданий ва ижтимоий аҳамиятга эга бўлган объектда қурилиш ҳамда ободонлаштириш ишлари жорий йил бошидан қайта тикланди ва изчил давом эттирилмоқда.