Экологик маданиятни юксалтириш ва табиатни асраш борасидаги ишлар таҳлили доирасида Ўзбекистон Экологик партияси Марказий Кенгаши раиси, партия фракцияси раҳбари Абдушукур Ҳамзаев ва депутат Ойбек Раҳимов Бухоро вилояти Олот туманида ўрганишлар олиб боришди.

Жумладан, Шайхлар маҳалласида бўлиб, Маҳалла бошқарувини самарали ташкил этиш доирасида маҳалла боғларини ташкил этиш ва кўчатларни хонадонларга бириктириш масалаларини муҳокама қилишди.

Туманнинг Човдир маҳалласида истиқомат қилувчи экофаол Бешин Бекмуродов хонадонда бўлган партия раҳбари ушбу оиланинг табиатга бўлган меҳри, томорқада ташкил этилган замонавий иссиқхона ва яратилган намунали яшил хонадон муҳитини юқори баҳолади. Шунингдек, Олот туманидаги 20-сонли давлат мактабгача таълим ташкилотида ташкил этилган кичик ботаника боғини ҳам кўздан кечирди. Абдушукур Ҳамзаев болаларда табиатга меҳр туйғусини айнан мана шундай боғларни парвариш­лаш орқали болаликдан шакллантириш зарурлигини таъкидлади.

Экологик барқарорлик йўналишидаги яна бир муҳим ўрганиш депутат Моҳира Ходжаева томонидан академик Мирзаев номидаги Боғдорчилик, узумчилик ва виночилик илмий-тадқиқот институтининг Бўстонлиқ филиалида амалга оширилди. Бу ерда «Яшил макон» лойиҳаси доирасида йилига 20 мингтагача мевали ва манзарали дарахт кўчатлари етиштирилаётгани ва бу кўкаламзорлаштириш ишларига катта ҳисса қўшаётгани қайд этилди. Тошкент шаҳрида эса депутат Борий Алихонов бошчилигидаги ишчи гуруҳ IMZO фабрикасида бўлиб, корхонадаги ишлаб чиқариш жараёни, чиқиндиларни самарали бошқариш ва яшил иқтисодиёт тамойилларининг татбиқ этилиши билан яқиндан танишди.