Зарафшон шаҳрида 5 июнь – Бутунжаҳон атроф-муҳит муҳофазаси куни муносабати билан ташкил этилган «5000 қадам» пиёда юриш акцияси шаҳар аҳолисини, ёшларни, депутатларни, умуман, барчани бир сафга жамлади.

Акциянинг бош мақсади одамларга пиёда юришнинг организм учун фойдасини эслатиш билан бирга, экологик тоза турмуш тарзини тарғиб қилиш эди. Машиналар тутунидан озгина узоқлашиб, соғлом ҳаёт сари ташланган бу беш минг қадам чинакам экологик маданият намойишига айланди. Иштирокчиларга мунтазам ҳаракатнинг аҳамияти ва табиатни тоза асрашнинг инсон умрига таъсири ҳақида жонли маълумотлар берилди.

Экофорум қатнашчилари шаҳарнинг энг гўзал яшил лойиҳаларидан бирига ташриф буюришди. Олий Мажлис Қонунчилик палатаси қўмита раиси Хайрилло Гаппоров бошчилигидаги меҳмонлар «Баҳор» маҳалласидаги олтмиш йиллик боғни кўздан кечиришди.

Бу боғ шунчаки дарахтзор эмас, у Зарафшон шаҳрининг экологик муҳитини соғломлаштириш, аҳолининг мазмунли дам олиши учун яратилаётган ўзига хос яшил воҳадир. Боғ ҳудудини янада кенгайтириш ва гўзаллаштириш мақсадида жами 15 минг туп манзарли дарахт ва бута кўчатларини экиш режалаштирилган. Форум иштирокчилари ушбу ишларнинг боришини кўриб, бунёдкорлик жараёнларига юқори баҳо беришди ва бу тажрибани бошқа саноат шаҳарларида ҳам қўллаш лозимлигини таъкидлашди.