Таълим фақатгина китоб ўқишу, синфхонларда тартибли ўтириш дегани эмас. Бугунги кунда таълим-тарбия экологик маданиятни ҳам ўз ичига олиши керак.

Сурхондарё вилояти Денов туманидаги 74-сон умумтаълим мактаби бугун мана шу ҳақиқатни ўз ҳаётига татбиқ эта олди. Халқаро «Eco-Schools Uzbekistan» лойиҳаси доирасида бу ерда шундай тизим йўлга қўйилдики, ушбу тажрибани ҳар бир мактабга намуна қилиб кўрсатса арзийди.

Мактаб ҳудудида барпо этилган замонавий иссиқхоналарда бодринг, турли кўкатлар, қулупнай ва бошқа мева-сабзавотлар етиштирилмоқда. Энг қувонарлиси, ўқувчилар ушбу жараёнларда шунчаки томошабин эмас, балки бевосита иштирокчидир. Улар экология, агрономия ва деҳқончилик сирларини жонли тарзда ўрганишмоқда. Бундан ташқари, мактабда қуён, товуқ, ғоз ва ўрдаклар парвариш қилинадиган махсус агроэкологик майдон ҳам бор. Бу орқали болаларда жонзотларга ғамxўрлик, меҳнатсеварлик ва табиатга чексиз меҳр туйғуси уйғонмоқда.

Ушбу яшил лойиҳалар мактабга ҳар ой 10 миллион сўмдан ортиқ даромад келтиряпти. Бу маблағ эса яна таълим сифатини оширишга, шароитларни яхшилашга сарфланмоқда.