Олий Мажлис Қонунчилик палатаси депутати, ЎЭП фракцияси аъзоси Моҳира Ходжаева бош­чилигидаги ишчи гуруҳ Қибрай туманида бўлиб, ҳудуд инфратузилмасини янада яхшилаш ва ободонлаштириш борасидаги саъй-ҳаракатларни ўрганди.

Ўрганиш жараёнида «Зебунисо» маҳалласининг бугунги кўриниши, амалга оширилган ободонлаштириш ишлари ва яратилган шарт-шароитларга алоҳида эътибор қаратилди. Бугунги кунда маҳалла гузарлари яшилликка буркангани, кўчалар доимий равишда озода сақланаётгани ҳамда аҳоли учун қулай муҳит шакллантирилгани гувоҳи бўлдик.

– Маҳалла – жамиятнинг кичик бир кўзгуси. Бу ердаги тартиб-интизом, тозалик ва яратилган имкониятлар аҳолининг турмуш сифати юксалаётганидан далолат беради, – деди Моҳира Ходжаева. – «Янги Ўзбекистон қиёфаси» дастури ижроси доирасидаги бундай намунали тажрибаларни бошқа ҳудудларда ҳам кенг жорий этиш муҳим аҳамиятга эга.

Ташриф давомида депутат маҳалла фаоллари билан суҳбатлашиб, мавжуд имкониятлардан унумли фойдаланиш ва ҳудудни янада ривожлантириш юзасидан таклиф ва мулоҳазаларни тинглади.