Олий Мажлис Қонунчилик палатаси депутатлари О.Литвинова ва Г.Агзамова Яшнобод туманидаги «Бешариқ» маҳалласида ўрганиш ишларини олиб борди.

Ўрганиш жараёнида Авиасозлар кўчасида жойлашган кўп қаватли уйлар ҳовлисида болалар ва спорт майдончалари йўқлиги билан боғлиқ ҳолат танқидий таҳлил қилинди. Аниқланишича, аввал ушбу ҳудудда фаолият юритган «WORKOUT» зонаси, волейбол ва футбол майдонлари демонтаж қилинган, бироқ уларнинг ўрнига янги спорт иншоотлари ўрнатилмаган. Ҳозирги пайтда спорт майдончаси ўрнида автомобиллар тураргоҳи ташкил этилган. Бу ҳолат болалар хавфсизлиги ва ёшларнинг бўш вақтини мазмунли ташкил этиш борасида аҳоли ўртасида ҳақли эътирозларни келтириб чиқармоқда.

Маҳалла аҳли фарзандлари учун хавфсиз дам олиш, спорт билан шуғулланиш ва дўстона мулоқот қилиш имкониятлари чекланиб қолганини таъкидлади.

Депутатлар замонавий болалар ва спорт майдончаларини қайта тиклаш ёшларни қўллаб-қувватлаш, соғлом турмуш тарзини шакллантириш ҳамда баркамол авлодни тарбиялашнинг асосий омилларидан бири эканини қайд этдилар.

– Болаларимизнинг хавфсизлиги ва уларнинг спорт билан мунтазам шуғулланиши учун шароит яратиш ҳар биримизнинг бурчимиздир. Ҳудуддаги бу каби бўшлиқларни тез фурсатда бартараф этиш ва спорт объектларини қайта барпо этиш бўйича зарур чораларни кўрамиз, – деди депутатлар.

Ўрганиш якунлари бўйича мазкур масала депутатлар назоратига олинди. Яқин кунларда Яшнобод тумани ҳокимлиги масъуллари билан ҳамкорликда «Бешариқ» маҳалласи болалари учун муносиб шароитлар яратиш юзасидан тегишли ишлар бошланади.