Халқ депутатлари Учтепа тумани Кенгашидаги ЎЭП депутатлари – Кимё Абдуллаева ва Санжар Жалолов Тошкент шаҳридаги йирик сув тозалаш иншоотларидан бири бўлган «Бўзсув» аэрация станцияси фаолияти бўйича ўрганиш ўтказди.

Депутатлар иншоотнинг техник ҳолати, сувни тозалаш босқичлари ва лаборатория таҳлиллари жараёни билан яқиндан танишдилар.

Ўрганишлар давомида маълум бўлишича, мазкур йирик станция суткасига ўртача 630 минг кубометр оқава сувни қабул қилиб, уни замонавий усулларда қайта ишлайди. Экологик меъёрларга мувофиқлаштирилган ва деярли тўлиқ тозаланган сув эса хавфсиз тарзда Бўзсув дарёсига қайтарилади. Таъкидлаш жоизки, мазкур иншоотнинг умумий лойиҳа қуввати суткасига 735 минг кубометрни ташкил этиб, у пойтахт экологик хавфсизлигини таъминлашда муҳим стратегик аҳамиятга эга. Депутатлар томонидан станция фаолиятини янада такомиллаштириш ва атроф-муҳитга салбий таъсирларнинг олдини олиш юзасидан тегишли тавсиялар берилди.