Табиатни муҳофаза қилиш фақатгина тарғибот-ташвиқот ишларидан иборат эмас. У қатъий назорат, тизимли ўрганиш ва аниқланган муаммоларни жойида ҳал этишни талаб қилади. Айниқса, чиқинди полигонларининг санитария ва экологик талабларга мувофиқлиги аҳоли саломатлигини белгиловчи асосий омиллардан биридир.

Шу мақсаддан келиб чиқиб, Ўзбекистон Экологик партияси Андижон вилоят кенгаши Қўрғонтепа туманидаги чиқинди полигонида кенг қамровли ўрганиш ишларини олиб борди. Жараёнда полигоннинг умумий ҳолати, ер майдонларидан мақсадли фойдаланиш, тўпланган чиқиндиларнинг ҳажми ва уларни зарарсизлантириш бўйича белгиланган талабларнинг бажарилиши синчиклаб таҳлил қилинди. Ўрганиш давомида рекультивация жараёнларидаги сусткашликлар ва айрим санитария камчиликлари аниқланиб, уларни тезкорлик билан бартараф этиш бўйича мутасадди ташкилотларга қатъий тавсиялар берилди. Партиянинг бу каби фаолияти ҳудудларда экологик қонунчилик ижросини таъминлаш ва атроф-муҳитга етказиладиган зарарнинг олдини олишда муҳим механизм бўлиб хизмат қилмоқда.