Олий Мажлис Қонунчилик палатаси депутати, Ўзбекистон Экологик партияси фракцияси раҳбари Абдушукур Ҳамзаев Қашқадарё вилоятидаги ўрганишлари доирасида Яккабоғ туманидаги «Айғиркўл» МФЙда бўлиб, маҳалла «еттилиги» фаолияти билан яқиндан танишди.

Маҳалла – ислоҳотларнинг бошланғич нуқтаси, шу боис ҳудудда киберхавфсизликни таъминлаш, аҳоли бандлигини ошириш, экологик барқарорлик ва чиқиндилар билан боғлиқ муаммоларни ҳал этиш ҳамда эҳтиёжманд оилаларни ижтимоий қўллаб-қувватлаш масалалари мулоқотнинг асосий мавзусига айланди.

Яккабоғ туманида бугунги кунда 59 та маҳалла фаолият юритмоқда. 2025 йилда туман миқёсида 35 та истиқболли тадбиркорлик лойиҳаси ҳаётга татбиқ этилган бўлса, 2026 йилда маҳаллаларни ҳар томонлама қўллаб-қувватлаш мақсадида 700 миллион сўм маблағ ажратилди. Ушбу маблағнинг 260 миллион сўми аҳолини тадбиркорликка йўналтириш учун кредит шаклида тақдим этилди. Натижада, қисқа фурсат ичида 10 та микролойиҳа ишга туширилиб, 35 нафар фуқаронинг доимий иш ўрнига эга бўлишига эришилди.

Ўрганишлар давомида депутат маҳалла «еттилиги» таркибидаги ёшлар етакчиси ва хотин-қизлар фаоли билан суҳбатлашиб, уларнинг фаолиятидаги ўсиш нуқталари ҳамда мавжуд тўсиқлар юзасидан фикр алмашди. Аҳоли томонидан билдирилган мурожаатлар, ижтимоий ва экологик муаммолар атрофлича кўриб чиқилиб, уларни жойида бартараф этиш бўйича тегишли тавсиялар берилди.