Мамлакатимизда экологик таълим тизими босқичма-босқич янги босқичга кўтарилмоқда. «Foundation for Environmental Education» ва «Zamin Foundation» ҳамкорлигида амалга оширилаётган халқаро «Eco-Schools» дастури бу борада муҳим ўрин тутади.

Мазкур лойиҳанинг афзаллиги шундаки, ўқувчиларда экологик маданият фақат назарий билимлар орқали эмас, балки амалий фаолият ва табиатни муҳофаза қилишга қаратилган реал ташаббуслар воситасида шаклланади. Бу эса ёш авлодда масъулият, экологик тафаккур ва фаол фуқаролик позициясини ривожлантиришга хизмат қилади.

Тошкент шаҳар Яшнобод туманидаги 255-мактабда амалга оширилаётган ташаббусларни бу борадаги ишларнинг ёрқин намунаси сифатида алоҳида қайд этиш мумкин. 2025-2026 ўқув йилида ушбу таълим муассасаси «Eco-Schools» дастурида муваффақиятли иштирок этмоқда. Экологик партиядан Олий Мажлис Қонунчилик палатаси депутати Ольга Литвинова, халқ депутатлари Тошкент шаҳар Кенгаши депутатлари Севара Файзиева ҳамда Муродхон Жўраев, Яшнобод туман Мактабгача ва мактаб таълими бўлими мудири Гулчеҳра Ёқубова мазкур мактабдаги шарт-шароитларни яқиндан ўргандилар.

Мактаб ҳудудида яшил майдонлар, сайр йўлаклари ва замонавий ёритиш тизимлари ташкил этилган бўлиб, энг муҳими – бу ерда ўқувчиларнинг сабзавот етиштириш бўйича кўникмаларини шакллантирувчи махсус иссиқхона фаолият юритмоқда. Таълим муассасасининг ютуқлари ҳам таҳсинга лойиқ: ўқувчиларнинг олий таълимга кириш кўрсаткичи 90 фоизни ташкил этади, 122 нафар педагогнинг 76 фоизи эса олий ва биринчи тоифали мутахассислардир. Мактабнинг туман миқёсидаги экологик тадбир ва танловлардаги фаоллиги инобатга олиниб, унга «Экомактаб» мақоми берилганлиги бежиз эмас. Бундай муассасалар келажак авлодни нафақат билимли, балки она табиатга меҳрли, масъулиятли инсонлар қилиб тарбиялашда муҳим ўрин тутади.