Экилган ҳар бир ниҳолнинг униб-ўсиши ва келажакда соя-салқин масканга айланиши бевосита бугунги агротехник тадбирларнинг сифатига боғлиқ. Яратилаётган ҳар бир янги боғ ва хиёбонларнинг бугунги ҳолати доимий назоратни талаб этади.

Шу мақсадда Ўзбекистон Экологик партияси Жарқўрғон туман кенгаши вакиллари ҳамда соҳа мутахассислари ҳамкорлигида навбатдаги мониторинг тадбири ташкил этилди. Ўрганиш давомида Қораянтоқ маҳалласи «Янги Ўзбекистон» массивида барпо этилган 2 гектар яшил ҳудуднинг жорий ҳолати кўздан кечирилди. Маълум бўлишича, айни пайтда мазкур майдонда 2 минг дона арча, гужум, тут ва қайрағоч кўчатлари парваришланмоқда. Шунингдек, нобуд бўлган ниҳоллар ўрнига янгилари ўтқазилиб, яшиллик даражаси сақлаб қолинган.

Лойиҳанинг изчиллигини таъминлаш мақсадида 2026 йилда яшил ҳудуд майдони яна 3 гектарга кенгайтирилиб, қўшимча равишда павлония, тут ва бошқа манзарали дарахтлар экилди. Эътиборли жиҳати, сув ресурсларидан оқилона фойдаланиш мақсадида бу ерда томчилатиб суғориш тизими ва оқава сувлардан фойдаланиш йўлга қўйилган.

Ўрганиш жараёнида айрим камчиликлар ҳам кўзга ташланди. Хусусан, ҳудуднинг автомобил йўлига яқин қисмларида маиший чиқиндилар тўпланиб қолгани ҳамда айрим дарахтларга агротехник ишлов бериш кечикаётгани танқидий таҳлил қилинди. Мониторинг якунида масъул шахсларга аниқланган муаммоларни тезкор бартараф этиш, ҳудудда тозаликни сақлаш ва кўчатлар парваришига алоҳида эътибор қаратиш бўйича зарур тавсиялар берилди.