Инсоният ва табиат ўртасидаги уйғунликни асраш, жамиятда экологик маданиятни юксалтириш бугунги куннинг энг долзарб вазифаларидан биридир.

Шу муносабат билан Ўзбекистон Экологик партияси Учтепа тумани кенгаши раиси ҳамда халқ депутатлари Учтепа тумани Кенгаши депутати ташаббуси билан Халқаро ўрмон кунига бағишланган кенг кўламли экологик акция ташкил этилди.

Жорий йилнинг 15 март куни экофаоллар ва партия аъзолари Тошкент вилоятининг сўлим гўшаларидан бири – Сўқоқ ўрмон хўжалиги ҳудудига сафар уюштиришди. Бундан кўзланган асосий мақсад, атроф-муҳитни муҳофаза қилиш, ўрмонларни асраб-авайлаш ва фуқароларда табиатга нисбатан масъулиятли муносабатни шакллантиришдан иборат эди.

– Акция доирасида «Мени асра – мени авайла, мен сенга керакман!» эзгу ғояси остида дарахт экдик, – дейди Ўзбекис­тон Экологик партияси Учтепа туман кенгаши раиси, туман Кенгаши депутати Кимё Абдуллаева. – Бир гуруҳ экофаоллар томонидан юзлаб манзарали ва мевали дарахт кўчатлари ўтқазилиб, ўрмон ҳудудининг яшиллик оламини янада бойитишга муносиб ҳисса қўшдик. Бу каби хайрли ташаббуслар нафақат бугунги кун, балки келажак авлод учун мусаффо ҳаво ва соғлом экологик муҳит яратиш йўлида муҳим қадам деб ўйлайман.

Экологик тадбир фақат кўчат экиш билан чекланиб қолмади. Иштирокчиларнинг соҳага оид билимларини мустаҳкамлаш мақсадида экология ва табиатни муҳофаза қилиш мавзусида қизиқарли викториналар ҳамда маърифий машғулотлар ташкил этилди. Жамоавий руҳни шакллантириш ва иштирокчилар ўртасида ҳамжиҳатликни мустаҳкамлашга қаратилган ўйинлар тадбирга ўзгача кўтаринкилик бағишлади. Бундай интерфаол усуллар ёшларда табиатга меҳр туйғусини кучайтириш билан бирга, уларни экологик муаммоларни ҳал этишда бирлашишга ундайди. Тадбир якунида ўрмонларни муҳофаза қилиш бўйича истиқболдаги режалар белгилаб олинди.