Жамиятнинг ижтимоий устувор йўналишлари, хусусан, тиббий хизмат сифати ва аҳоли саломатлигини муҳофаза қилиш масалалари доимий депутатлик назоратида бўлиб келмоқда.

Шу мақсадда, халқ депутатлари Шўрчи тумани Кенгашига Ўзбекистон Экологик партиясидан сайланган 6-сонли «Совур» сайлов округи депутати Муҳайё Юлдашева ўз округи ҳудудида жойилашган ижтимоий соҳа объектлари фаолияти билан яқиндан танишди. Ўрганишлар давомида тиббиёт муассасаларида беморлар учун яратилган шарт-шароитлар, кўрсатилаётган тиббий хизматнинг сифат даражаси, зарур дори-дармон воситалари таъминоти ҳамда тиббиёт ходимларининг иш фаолияти атрофлича таҳлил қилинди.

Депутат соҳа мутахассислари билан ўтказилган мулоқот давомида мавжуд муаммоларни бартараф этиш ва аҳолининг тиббий хизматдан розилигини таъминлаш юзасидан аниқ чораларни белгилаб олди. Халқ вакили муассасаларнинг моддий-техник базаси ва санитария-эпидемиологик ҳолатига алоҳида эътибор қаратди.

– Асосий мақсадимиз чекка ҳудудлардаги тиббиёт масканларида ҳам аҳоли учун сифатли ва хавфсиз муҳит яратишдир. Ўрганишлар давомида айрим камчиликлар кузатилган бўлса-да, уларни бартараф этиш бўйича мутасаддилар билан тегишли вазифаларни белгилаб олдик. Зеро, аҳоли саломатлиги – жамиятнинг энг катта бойлиги, тиббиёт муассасалари эса экологик жиҳатдан ҳам, хизмат кўрсатиш борасида ҳам намунали бўлиши шарт, – дейди Экопартия депутати Муҳайё Юлдашева.

Бу каби ўрганишлар ҳудуддаги ижтимоий соҳа вакилларининг масъулиятини ошириш билан бирга, фуқароларнинг давлат идораларига бўлган ишончини янада мустаҳкамлашга хизмат қилади. Депутат томонидан билдирилган таклиф ва тавсиялар асосида соҳадаги мавжуд муаммоларни тизимли ҳал этиш чоралари кўрилмоқда.