Куни кеча Президентимиз Шавкат Мирзиёев Самарқанд шаҳрига ташрифи давомида шаҳарга жамоат транспорти учун олиб келинган замонавий электробуслар ва қувватлаш станция­си фаолияти билан танишди.

Биринчи босқичда 49 миллион доллар эвазига 100 та «Yutong» электробуси олиб келинган. Ҳар бир автобус 75 нафаргача йўловчини сиғдира олади ва 9 та йўналишда кунига қарийб 70 минг аҳолига хизмат кўрсатмоқда. 4 гектар майдонда барпо этилган автосарой ҳамда бир вақтнинг ўзида 50 та электробусни қувватлай оладиган станция тизим самарадорлигини оширмоқда. Иккинчи босқичда эса яна 150 та электробус учун 120 миллион доллар жалб этилиши режалаштирилгани айтилмоқда.

«Яшил транспорт»га ўтиш натижасида ёқилғи сарфи 32 минг литрга, зарарли газлар эса 27 тоннага камайиши кутилмоқда. Бу ташаб­бус «яшил иқтисодиёт» ва экологик барқарорлик йўлидаги муҳим қадамдир.