Бугунги кунда давлат органлари ва халқ ўртасидаги очиқ мулоқотни таъминлаш, фуқароларнинг дард-у ташвишларига қулоқ тутиш давлат сиёсатининг энг муҳим йўналишларидан бирига айланди.

Шу мақсадда Олий Мажлис Қонунчилик палатаси депутати Сапаргул Утемуратова томонидан Амударё тумани ҳокимлиги биносида навбатдаги фуқаролар қабули ташкил этилди. Депутат ҳудуд аҳолисини қийнаётган долзарб ижтимоий-иқтисодий масалаларни жойида ўрганиш ва уларга ҳуқуқий ечим топишга астойдил ҳаракат қилди.

Қабул давомида асосий эътибор аҳоли бандлигини таъминлаш, кичик бизнес ва хусусий тадбиркорликни ривожлантириш ҳамда ёшлар ва хотин-қизларни ҳар томонлама қўллаб-кувватлаш масалаларига қаратилди. Мурожаат билан келган ҳар бир фуқаронинг муаммоси депутат томонидан батафсил тингланиб, уларни амалдаги қонунчилик доирасида ҳал этиш бўйича зарур тавсия ва тушунтиришлар берилди. Таъкидлаш жоизки, мулоқот давомида билдирилган таклиф ва ташаббуслар ҳам эътибордан четда қолмади.

Шунингдек, ўрганиш жараёнида зудлик билан ҳал этилиши лозим бўлган айрим мурожаатлар юзасидан тегишли ташкилот ва соҳа мутасаддилари билан ҳамкорликда амалий чоралар кўриш белгиланди. Мураккаб характердаги масалалар эса депутатлик назоратига олиниб, уларнинг ижроси юзасидан масъулларга тегишли кўрсатмалар берилди.