Атроф-муҳит мусаффолигини сақлаш ва аҳоли яшаш жойларида санитария ҳолатини яхшилаш Ўзбекистон Экологик партияси фаолиятининг энг устувор йўналишларидан бири. Партиянинг ижтимоий тармоқлардаги расмий саҳифалари орқали жамоатчилик назорати тизимининг самарали йўлга қўйилгани жойлардаги муаммоларни тезкор аниқлаш ва бартараф этиш имконини бермоқда.

Яқинда ЎЭП Арнасой туман кенгаши раиси У.Қўчқоров ҳамда «Ёшлар қаноти» етакчиси А.Яхшиликов томонидан «Олтин водий» маҳалла фуқаролар йиғини ҳудудидаги кўп қаватли уйлар атрофида чиқиндилар ўз вақтида олиб чиқиб кетилмаётгани ҳақида танқидий хабар берилган эди. Мазкур ҳолат партия фаоллари томонидан ўрганилиб, тегишли ташкилотларга мурожаат қилингач, масъуллар томонидан тезкор чоралар кўрилди. Натижада ҳудуд қисқа фурсатда чиқиндилардан тўлиқ тозаланиб, аҳоли учун қулай ва тоза муҳит қайта тикланди.

Шу ўринда таъкидлаш жоизки, Ўзбекистон Экологик партияси бу каби ҳолатларни бартараф этиш ва олдини олиш ишларини изчил давом эттиради. Мамлакатимизнинг барча ҳудудларида ноқонуний чиқиндихоналар юзага келишига йўл қўймаслик, мавжудларини эса тизимли равишда тугатиш бўйича кенг кўламли фаолият олиб борилмоқда.