Олтинсой туманининг Оқарбулоқ маҳалласида замонавий архитектура ва экологик масъулият уйғунлигини ўзида мужассам этган йирик лойиҳа – 15 та 7 қаватли турар жой мажмуаси қад ростламоқда.

Лойиҳа нафақат аҳолини уй-жой билан таъминлаш, балки улар учун хавфсиз ва қулай яшаш муҳитини яратишни мақсад қилган. Мажмуа ҳудудида 90 ўринли боғча, савдо ва хизмат кўрсатиш шохобчалари барпо этилиши эса унинг ижтимоий аҳамиятини янада оширади.

Қурилиш ишларида фақат биноларнинг мустаҳкамлиги эмас, балки уларнинг атроф-муҳитга таъсири ва экологик нормаларга мослиги ҳам асосий диққат марказида. Ўзбекистон Экологик партияси Олтинсой туман кенгаши ишчи гуруҳи мазкур жараённи яқиндан ўрганиб бормоқда. Партия фаоллари томонидан болалар майдончаларининг санитария-экологик хавфсизлиги, ҳудудда яшил майдонлар барпо этиш режалари ҳамда муҳандислик-коммуникация тизимларининг ҳолати синчиклаб мониторинг қилинди.

Бундай ўрганишлардан кўзланган бош мақсад – лойиҳанинг ҳар бир босқичида табиий ресурслардан оқилона фойдаланиш ва экологик хавфларнинг олдини олишдир. Натижада Олтинсой аҳолиси нафақат янги хонадонларга, балки экологик тоза ва хавфсиз яшаш муҳитига эга бўлади.