Ўзбекистон Париж битимига мувофиқ ўзининг 3-Миллий миқёсда белгиланадиган ҳиссасини (ММБҲ 3.0) эълон қилди. Миллий шароитлар ва имкониятларни инобатга олган ҳолда, Ўзбекистон Республикаси «2010 йил даражасига нисбатан 2035 йилгача ялпи ички маҳсулот бирлигига тўғри келадиган иссиқхона газлари ташламалари (яъни уларнинг интенсивлиги)ни 50 фоизга камайтириш» мажбуриятини олди.

Ушбу ҳисобот 10 — 21 ноябрь кунлари Бразилиянинг Белен шаҳрида бўлиб ўтаётган Иқлим ўзгариши тўғрисидаги Ҳадли конвенцияси томонлари конференциясида (CОP30) расмий равишда тақдим этилди.

Янги ММБҲ 3.0 мақсадлари Экология, атроф-муҳитни муҳофаза қилиш ва иқлим ўзгариши вазирлиги, хусусий сектор, фуқаролик жамияти, халқаро молия институтлари ва БМТ Тараққиёт дастурининг фаол иштирокида амалга оширилган саъй-ҳаракатлар натижасидир.

Янги ММБҲни ишлаб чиқиш 2025 йил – Атроф-муҳитни асраш ва «яшил» иқтисодиёт йили доирасида амалга оширилди. Ушбу ташаббус миллий иқлим сиёсати фаолиятини кучайтириш, энергетик трансформация ва барқарор ривожланишга қаратилгандир.

ММБҲ, шунингдек, Ўзбекистоннинг миллий иқлим мақсадларини иқтисодий модернизация, ўрта даромадли мамлакат мақомини қўлга киритиш ва ижтимоий инклюзияни кенгайтириш вазифалари билан узвий боғлашга бўлган қатъий интилишини ҳам таъкидлайди. ММБҲ 3.0 мақсадларига мувофиқ яшил иқтисодиётни ривожлантириш мамлакатда гендер тенглигини яхшилашга, меҳнат бозорида имкониятларни кенгайтиришга ва ижтимоий адолатни мустаҳкамлашга хизмат қилади. Бу эса мамлакатнинг кенг қамровли ижтимоий ривож­ланиш дастурлари билан ҳамоҳангдир.

ММБҲ 3.0 ни тайёрлаш жараёнида ёшларнинг ташаб­бусларига алоҳида эътибор қаратилган, уларнинг қатор ғоялари ҳужжатда ўз ифодасини топган. Шу орқали Ўзбекистон нафақат халқаро иқлим мажбуриятларини бажаришга, балки экологик масъулиятли ва инклюзив келажакни барпо этишга, ҳар бир фуқаронинг барқарор ривожланишга ўз ҳиссасини қўшишига интилаётганини намойиш этмоқда.

Экология вазирлиги матбуот хизмати