Куни кеча Президентимиз Шавкат Мирзиёевнинг Наманган вилоятига ташрифи вилоят аҳли учун катта воқеа, ҳар бир маҳаллага улкан ўзгаришларни олиб кирадиган тарихий ишлар дебочаси бўлди.

Сўнгги йилларда юртимизнинг ҳар бир ҳудуди сингари Наманган ҳам улкан иқтисодий ва ижтимоий ўзгаришлар марказига айланди. Сўнгги саккиз йил ичида вилоятимизга 7 миллиард доллардан ортиқ хорижий инвестиция жалб этилиб, 8 мингга яқин янги корхоналар ишга туширилгани бунинг яққол исботидир.

Кечаги ташриф давомида илгари сурилган ҳар бир ташаббус, хусусан, экологик самарадорлик, табиий ресурслардан оқилона фойдаланиш, энергия тежамкор технологияларни жорий этиш каби масалалар биз учун ҳам долзарб вазифа ҳисобланади. Масалан, Чуст туманидаги «Мегатон» корхонасида қурилиш материаллари ишлаб чиқаришда энергия тежовчи технологиялардан фойдаланилиши, Чортоқ туманидаги «Айқирон-1» насос станциясининг замонавий, кам энергия сарфловчи ускуналар билан жиҳозланиши аҳолининг экологик онгини юксалтириш ва яшил иқтисодиёт тамойилларини ҳаётга татбиқ этишда муҳим қадамдир.

Президентимиз томонидан берилган топшириқ ва кўрсатмалар вилоятимиз иқтисодиётини юксалтириш баробарида, экологик барқарорликни таъминлаш, табиий ресурсларни тежаш ва атроф-муҳитни муҳофаза қилишда улкан аҳамият касб этади.

Биз, Экологик партия вакиллари, мазкур вазифаларни амалга оширишда фаол иштирок этишга, ҳар бир туман ва шаҳар миқёсида экологик лойиҳаларни кенг татбиқ этишга тайёрмиз. Зеро, иқтисодий тараққиёт билан бир қаторда экологик мувозанатни асраб-авайлаш келажагимиз кафолатидир.

Музаффар ХУДОЙБЕРДИЕВ,

ЎЭП Наманган вилоят партия ташкилоти раиси в.в.б