Бахтиёр ПЎЛАТОВ, Олий Мажлис Қонунчилик палатаси депутати, ЎЭП фракцияси аъзоси

Бугун мамлакат иқтисодиёти тадбиркорлик фаолияти орқали салмоқли ютуқларни қўлга киритмоқда. Айниқса, айланма иқтисодиётнинг йўлга қўйилиши ҳамда ишлаб чиқариш ва хизмат кўрсатиш соҳаларида «яшил» тамойилларга асосланиш моддий манфаат билан бирга, экологик барқарорликни таъминлашга ҳам хизмат қилмоқда.

Фаол ислоҳотлар бутун мамлакатимиз ривожига ижобий таъсир кўрсатмоқда. Фикримиз исботини охирги 8 йилда турли соҳаларга 230 миллиард доллар инвестиция кириб келгани, шундан 120 миллиарддан ортиғи хорижий сармоя экани яққол тасдиқлаб турибди. Жаҳон иқтисодиёти мураккаб вазиятни бошдан ўтказаётган бир пайтда, прагматик ва проактив сиёсат натижасида бу йил биринчи ярим йилликда иқтисодиётимиз 7,2 фоизга ўсди.

Ўтган даврда минглаб микро ва кичик корхоналар қисқа муддатда яратилган шароитлардан самарали фойдаланган ҳолда, катта-катта компаниялар билан рақобат қила бошлади. Масалан, 1600 та микро корхона бир йил ичида айланмасини 10 миллиард сўмдан ошириб, бирданига ўрта корхона, 143 таси эса 100 миллиард сўмдан ошириб, йирик корхонага айланди. Яна 122 та кичик корхона йирик бизнес субъектлар сафига қўшилди.

Бугун одамларда тадбиркорларга нисбатан ишонч, ҳурмат ва меҳр ошди. Тадбиркорлар томонидан қўшимча иш ўринлари яратилди. Хусусан, 139 мингта корхонада иш ўринлари 811 мингта кўпайди. 2024 йили хусусий секторда ўртача ойлик 4 миллион сўмни ташкил қилган бўлса, бугунги кунда 5 миллион сўмга яқинлашди. Албатта, бу рақамлар тўғри олиб борилган сиёсат, тадбиркорлар учун яратилган имкониятлар ва тадбиркорларнинг бу имкониятлардан самарали фойдаланаётгани мевасидир.