Ойбек РАҲИМОВ, Олий Мажлис Қонунчилик палатаси депутати, ЎЭП фракцияси раиси ўринбосари

Замонавий дунёда экология масалалари глобал муаммога, бутун инсоният тақдирини белгилайдиган асосий омилга айланмоқда. Глобал исиш, ҳаво ифлосланиши, сув танқислиги ва чиқиндилар муаммоси каби масалалар инсониятдан бирлашган ҳолдаги саъй-ҳаракатни талаб этади.

Юртимизда эса кейинги йилларда экологик сиёсат давлат даражасидаги устувор йўналишга айланди.

Янгича қонунлар, миллий дастурлар ва йирик лойиҳалар амалга оширилмоқда. «Яшил макон» умуммиллий ҳаракати доирасида миллионлаб кўчатлар экилиб, шаҳар ва қишлоқларимиз обод манзилга айланмоқда. Чиқиндиларни қайта ишлаш, қайта тикланадиган энергия манбаларидан фойдаланиш, сув ресурсларини асраб-авайлаш масалалари ҳам кун тартибининг биринчи қаторига чиқди.

Бу жараёнда давлатнинг қатъий сиёсати билан бир қаторда, ҳар бир фуқаронинг шахсий иштироки ҳам муҳим аҳамият касб этади. Чунки табиатни асраш давлат сиёсати орқали йўлга қўйилса ҳам, унинг амалиётга татбиқ этилиши ҳар бир инсоннинг онгли муносабатига боғлиқ.

Азиз юртдошлар! Сизларни мустақиллик байрами билан қутлар эканман, юртимизда тинч­лик, халқимиз ҳаётида соғлом муҳит ва фаровонлик бўлишини тилайман.