Нуриддин НУРИЛЛАЕВ, Ёшлар парламенти аъзоси

Ёшлар – келажак бунёдкорлари. Улар фақат илм ва касб эгаси эмас, балки табиат муҳофазасига ҳам масъул шахслар сифатида вояга етишлари керак. Чунки келажакда улар нафақат ўз ҳаёти, балки бутун мамлакатдаги атроф-муҳит ҳолати учун жавобгар бўлади.

Сўнгги йилларда юртимизда ёшлар экологик ҳаракатларнинг фаол иштирокчисига айланди. Мактаб ва университетларда экологик акциялар, кўчат экиш тадбирлари, «яшил ҳаёт» тарзини тарғиб қилувчи лойиҳалар ташкил этилаётгани қувонарли ҳолдир. Чунки бола гул экишни, табиатга меҳр билан қарашни ўрганса, бу одат унинг бутун ҳаётида давом этади.

Давлатимиз томонидан ҳам ёшлар экология соҳасида қўллаб-қувватланмоқда. Туризм ва экология йўналишидаги халқаро форумларда, ёшлар қурултойларида юртимиз ёшлари фаол иштирок этмоқда. Улар ўз ташаббуслари билан нафақат юртимиз, балки бутун дунё экологик ҳамжамиятида муносиб ўрин эгаллаб келмоқда.

Азиз ёшлар! Сизларни табиатни асрашда фаол, келажак учун масъулиятли, янги ғоялар ташаббускори бўлишга чақираман. Бугунги меҳрингиз эртанги соғлом ҳаётнинг асоси бўлади!