Сурхондарё вилояти Олтинсой туманидаги «Экраз» маҳалласи «Заркамар» кўчасида экологик тарғибот ойлиги доирасида навбатдаги ташаббус амалга оширилди.

Унда Ўзбекистон Экологик партияси Сурхондарё вилоят ҳамда туман (шаҳар) партия ташкилотлари ташаббуси билан маҳалла ички кўчаларидаги 5 км ариқни бетонлаш бўйича ҳашар уюштирилди. Ҳозирда жараён маҳалла раиси бошчилигида изчил давом эттирилмоқда.

Ушбу ободонлаштириш ишларига вилоят партия ташкилоти томонидан 2 тонна цемент ҳомийлик асосида ажратилди. Маҳалла раиси, фаол фуқаролар ва кенг жамоатчилик вакиллари ҳам ҳашарга ўз ҳиссаларини қўшмоқдалар.

Мутахассислар фикрича бетонлаш ишларини амалга ошириш натижасида томорқа суғориш учун келадиган сувнинг исрофи 40 фоизгача олди олинади. Сув ресурсларидан оқилона фойдаланиш имконияти кенгаяди, маҳалла кўчаларининг эстетик қиёфаси яхшиланди, обод муҳит шаклланди.

Бундай ташаббуслар маҳаллаларда нафақат экологик муҳитни яхшилаш, балки фуқароларнинг экологик маданиятини ошириш, биргаликдаги ҳамкорлик ва жамоатчилик фаоллигини мустаҳкамлашга хизмат қилмоқда.

Камолиддин РЎЗИМАТОВ тайёрлади.