Наманган шаҳар марказида юзага келган санитар ҳолат билан боғлиқ муаммо жойида ҳал этилди.

ЎЭП Марказий Кенгашига шаҳар аҳолиси томонидан келиб тушган мурожаатга асосан, чиқиндиларнинг тартибсиз тўпланаётгани, махсус чиқинди идишлари ўрнатилмагани ҳамда чиқинди олиб кетиш тизимидаги муаммолар ҳақида билдирилган маълумотлар партия томонидан назоратга олинди.

Мурожаат юзасидан ЎЭП Наманган вилоят кенгаши раиси Музаффар Худойбердиев бошчилигида, вилоят Экология, атроф-муҳитни муҳофаза қилиш ва иқлим ўзгариши бошқармаси мутахассислари билан ҳамкорликда ўрганиш ишлари олиб борилди.

Натижада, кўрсатилган ҳудуддаги чиқиндилар масъул хизмат кўрсатувчи ташкилотлар томонидан тўлиқ тозаланди. Чиқинди ташлаш учун махсус контейнерлар ўрнатиш ва мунтазам тозалаш ишларини йўлга қўйиш юзасидан мутасаддилар билан биргаликда чоралар ишлаб чиқилди.

Экологик партия фуқароларнинг ҳар бир мурожаатига эътибор билан ёндашади. Аҳоли билан ҳамжиҳатликда экологик муаммоларни аниқлаш ва уларни бартараф этиш партия фаолиятининг устувор йўналишларидан бири ҳисобланади.

Камолиддин РЎЗИМАТОВ тайёрлади.