Айни кунда мамлакатимизда ғалла ўрим-йиғими давом этмоқда. Ғалла ҳосилидан бўшаган майдонлар шудгорланиб, ўрнига такрорий экинларни экиш ишлари бошлаб юборилган.

Бироқ айрим шахслар пайкалларни ҳайдашдан олдин буғдой поялари, сомон ва ёввойи ўсимликлар қолдиқларидан тозалашга эриниб, осонгина ёқиб юбориш усулини қўлламоқда.

ЎЭП Қашқадарё вилоят кенгаши раиси Носир Халимов бошчилигидаги партия фаоллари ҳамда Экология, атроф-муҳит муҳофазаси ва иқлим ўзгариши бошқармаси туман бўлими инспекторлари Нишон туманидаги ғалла майдонларида бўлиб, фермерлар билан учрашди. Сомонпояларни ёқмаслик бўйича тушунтириш ишлари олиб борилди.

Жумладан, «Пахтазор» МТПга қарашли «Сувон Баратович» фермер хўжалиги ғалла майдонида ўрим жараёнлари кўздан кечирилди. Фермерлар билан ўтган суҳбат давомида сомонпояни ёқиш оқибатида келиб чиқадиган зарарлар ҳақида айтилди.

Сомоннинг ёқиб юборилиши нафақат атроф-муҳитни ифлослантириб, туп­роқ унумдорлигини пасайтиради, балки чорва моллари озуқасига ҳам путур етказиб, иқтисодий зарар келтиради. Сомони ёқилган ҳудудларда ер унумдорлиги йўқолиб, тупроқ структураси бузилади. Юқори ҳарорат туфайли макро ва микроэлементлар йўқ бўлиб кетиши оқибатида экин ерларининг балл бонитети кескин пасаяди.