Яқинда ЎЭП «ишонч телефони»га ҳайвонларнинг ноқонуний савдоси билан боғлиқ ҳолатлар бўйича чора кўрилмаётгани ҳақида бир гуруҳ фуқаролардан мурожаат келиб тушди.

Мазкур мурожаат асосида ЎЭП фаоллари ва депутатлари ташаббуси билан пойтахтимиздаги «Янгиобод» бозорида жамоатчилик назорати тадбири ўтказилди. Партиямиздан Олий Мажлис Қонунчилик палатаси ҳузуридаги Ёшлар парламенти аъзоси А.Азегов, депутат ёрдамчиси А.Фаррухова, Мирзо Улуғбек туман Кенгаши депутати И.Маткаримова ҳамда Экология вазирлигининг Тошкент шаҳар бошқармаси мутасаддилари, «Ҳаёт» ва «Эколог» нодавлат ташкилотлари вакиллари иштирок этишди.

Тадбир давомида бозор ҳудудида бир қатор қонунбузарлик ҳолатлари аниқланди ва улар бўйича тегишли ҳуқуқий чора кўрилди.

Рейд якунида бозор маъмурияти билан келишувга эришилди. Унга кўра, эндиликда ҳар ҳафта «Экофаоллар» иштирокида бозорда экологик меъёр ва талаблар бажарилиши юзасидан доимий мониторинг олиб бориладиган бўлди.

ЎЭП жамоатчилик назоратини кучайтириш, фуқаролар мурожаатларига бефарқ бўлмаслик ва экологик қонунчиликка риоя этилишини таъминлаш борасида ўз фаолиятини изчил давом эттиради.