Иқлим ўзгариши бугунги кунда нафақат муайян бир ҳудудда, балки дунёнинг барча минтақаларида глобал аҳамият касб этмоқда.

Баъзи бир антропоген омиллар таъсирида юзага келгани айтилаётган мазкур масалани ижобий ҳал қилишнинг тугал механизми жорий қилинмаган бўлса-да, унинг оқибатларини юмшатиш ҳамда зарарини имкон қадар камайтиришда дунё ҳамжамияти салмоқли ҳаракатлар қилмоқда.

Жорий йил 4-5 апрель кунлари юртимизда бўлиб ўтадиган биринчи Самарқанд иқлим форуми ана шундай халқаро мулоқотлардан бири бўлиши кутилмоқда. Форумда жаҳон етакчилари, сиёсатчилар, экспертлар ва фаоллар Марказий Осиё ва дунё дуч келаётган долзарб иқлим муаммоларини муҳокама қилишади.

«Марказий Осиё глобал иқлим муаммоларига дуч келмоқда: умумий фаровонлик учун бирлашиш» мавзусидаги форум экологик барқарорлик, яшил иқтисодий ривожланиш ва иқлим барқарорлиги­
­бў­йича мулоқотни илгари суриш учун юқори ­даражадаги платформага айланади.

Асосий эътибор минтақавий ва халқаро ҳамкорликка қаратилган. Иқлим форуми қайта тикланадиган энергетикани ривожлантириш, сув ресурсларини комплекс бошқариш, биологик хилма-хилликни сақлаш ва барқарор шаҳар тараққиёти каби асосий йўналиш­лар бўйича эксперт панеллари, ялпи сессиялар ва сиёсий мулоқотларни таклиф қилади.

Марказий Осиё минтақасидаги глобал экологик вазиятда Орол денгизининг қуриган тубида ҳосил бўлаётган микроиқлимнинг ҳам сезиларни таъсири мавжуд. Тупроқ эрозияси, сув ва атмосфера ифлосланиши, биологик хилма-хилликка зиён етиши, инсон саломатлиги билан боғлиқ масалалар мазкур муаммо кўламини яққол кўрсатиб турибди. Сўнгги йилларда олиб борилган тизимли ислоҳотлар натижасида муаммони сезиларли даражада бартараф этишга эришилмоқда. Аммо экотизимнинг тўла тикланиши биргина ҳудуд имконидаги вазифа эмаслиги кундек равшан. Бунга халқаро ташкилотлар ва қўшни минтақалар вакилларининг ҳамкорликдаги фаолияти зарур бўлади.

Халқаро форумдаги муҳокаманинг асосий мавзуларидан бири глобал миқёсдаги экологик ҳалокатнинг яққол намунаси бўлган Орол денгизи инқирозидир. Мутахассислар ва ҳукумат вакиллари зарар кўрган ҳудудларда ерларни тиклаш, чўлланишга қарши курашиш ва иқлим ўзгаришининг ижтимоий-иқтисодий оқибатларини камайтириш бўйича барча ечимларни кўриб чиқишади.

Тадбирнинг асосий натижаси Самарқанд форумининг якуний ҳужжати – «Яшил» ривожланишнинг Минтақавий концепцияси тақдимоти бўлиб, у иқлим ўзгариши соҳасида Марказий Осиё давлатларининг ягона минтақавий қарашларини шакллантиришга асос солади. Унда етакчи халқаро ташкилотларнинг минтақадаги экологик муаммоларни ҳал қилиш борасидаги ёндашувлари баён қилинади.

Бундай нуфузли форумнинг юртимизда ўтказилиши экологик вазиятни янада барқарорлашириш борасида Ўзбекистон учун янги марраларни белгилаб бериши шубҳасиз. Форум тафсилотлари ОАВда мунтазам ёритиб борилади.

Экология вазирлиги Матбуот хизмати