Ўзбекистонда дарахтларни ноқонуний кесишга қарши қатъий чоралар кўрилмоқда, дейилади Ўзбекистон Республикаси Бош прокуратураси ахборотида. Мамлакатимизда эълон қилинган мораторий ҳануз амал қилиб, дарахтларни нобуд қилиш ёки шикастлаш учун жиноий жавобгарликкача бўлган жазо чоралари белгиланган.  

Экологик маданиятнинг ошиши ва аҳолининг яшил муҳитни асрашга бўлган масъулияти кучайиши туфайли мамлакатимизда ноқонуний дарахт кесиш ҳолатлари тубдан камайди. Жумладан, мораторий жорий этилгунга қадар бўлган даврга нисбатан бу каби қонунбузарликлар 60 фоизга камайган. Бу эса фуқароларнинг фаоллиги ва жамоатчилик назоратининг кучайганини англатади.

Шу билан бирга, ноқонуний дарахт кесиш ҳолатлари бутунлай йўқолгани йўқ.

2025 йилнинг ўтган даврида республика бўйича 848 туп дарахт ноқонуний кесилиб, табиатга жиддий зиён етказилган. Ҳар бир ҳолатда айбдор шахсларга нисбатан қонунга мувофиқ жазо чоралари қўлланилган.

Масалан, жорий йилнинг 13 февраль куни Фарғона вилояти Қўқон шаҳри, «Зилол» МФЙ, Ҳуқандий мавзесидаги бир неча ўн йиллик чинор дарахтига қасддан шикаст етказилди.

Икки нафар шахс ушбу дарахтни йўқ қилишга уриниш давомида экология ва ички ишлар органлари ходимларига қаршилик кўрсатиб, уларни ҳақоратлашган. Ушбу ҳолат ижтимоий тармоқларда ҳам кенг муҳокамага сабаб бўлди.

Мазкур ҳолат юзасидан Жиноят кодексининг 198-моддаси (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) ва бошқа моддалари бўйича жиноят иши қўзғатилган, дейилади Бош прокуратура ахборотида.