Мамлакатимизнинг атроф-муҳит ва экология барқарорлиги борасидаги тизимли фаолияти ўзининг ижобий самарасини бермоқда.

Барқарор ривожланиш мақсадларига эришишда ўзига хос Ўзбекистон тажрибасига асос солиняпти. Бу халқаро майдонда ҳам мутахассислар эътирофига сазовор бўлмоқда.

2025 йил 21 январь куни Олий Мажлис Қонунчилик палатасидаги Ўзбекистон Экологик партияси фракцияси ҳамда Экология ва атроф-муҳитни муҳофаза қилиш масалалари қўмитаси вакилларининг Халқаро табиатни муҳофаза қилиш иттифоқининг Шарқий Европа ва Марказий Осиё бўйича минтақавий директори Оливер Аврамовски­ бошчилигидаги делегация аъзолари билан учрашувида айни шу масалалар юзасидан фикр алмашилди, дея хабар берди Олий Мажлис Қонунчилик палатаси матбуот хизмати.

Мулоқот аввалида делегация аъзоларига янги таҳрирдаги Конституция ва «Ўзбекистон – 2030» стратегиясида белгиланган устувор вазифалар доирасида мамлакатда амалга оширилаётган кенг кўламли ислоҳотлар ҳақида батафсил маълумот берилди.

Ўз навбатида, О.Аврамовски Ўзбекистонда экология ва атроф-муҳитни муҳофаза қилиш, ЮНЕСКОнинг Умумжаҳон маданий меросига киритилган объектларнинг муҳофаза қилиниши бўйича амалга оширилаётган кенг кўламли чора-тадбирларни юқори баҳолади.

Учрашув давомида табиий ресурслардан оқилона фойдаланиш, экологик барқарорликни таъминлаш ва атроф-муҳитни муҳофаза қилиш йўналишида ҳамкорликни ривожлантириш ҳамда халқаро конвенция нормаларини миллий қонунчиликка уйғунлаштириш масалалари муҳокама қилинди. Бу борада ўзаро ҳамкорликни Халқаро табиатни муҳофаза қилиш иттифоқининг Тошкентдаги ваколатхонаси орқали янада мустаҳкамлашга келишиб олинди.

Бундай ҳамкорлик истиқболдаги мақсад ва режалар ижросини таъминлашда ҳар томонлама манфаатли бўлиши муқаррар.