Қорақалпоғистон Республикаси Жўқорғи Кенгеси депутатлигига номзод Ж.Мустафаев Қўнғирот тумани 52-сонли умумтаълим мактабида маҳалла сайловчилари билан учрашди.

Экопартия Қорақалпоғистон Республикаси партия ташкилоти кенгаши раиси А.Бегимова номзоднинг сайловолди дастуридаги асосий йўналишлар, жумладан, мамлакатимизнинг қурғоқчил ҳудудларида истиқомат қилаётган аҳоли орасида экологик муаммолар туфайли юзага келаётган касалликларни аниқлаш, доимий мониторинг қилиб бориш ва уларнинг олдини олиш чораларини кўриш, ичимлик сув, тоза ҳаво, муқобил энергия ва бошқа тақчиллиги ортиб бораётган табиий ресурсларни асрашга қаратилган ҳамкорликни кенгайтириш каби ташаббуслар ҳақида маълумот берди.

– Айни чоғда инсоннинг қулай атроф-муҳитга эга бўлиши, экологик хавфсизликни таъминлаш, табиат ресурсларидан оқилона фойдаланиш, уларни ҳуқуқий жиҳатдан муҳофаза қилиш, экологик ҳуқуқбузарликларнинг олдини олиш ва уларга қарши курашиш ғоят муҳим масалалардан бири саналади. Табиатдаги глобал иқлим ўзгаришлари, Орол денгизининг қуриши билан боғлиқ вазиятнинг тобора кескин тус олаётгани сабабли бу воқеаларга бефарқ бўла олмаймиз. Соғлом яшашимиз, тоза ҳаводан нафас олишимиз, келажак авлодлар учун соф табиат қолдиришимиз учун бугундан ҳаракатни бошлашимиз керак, – деди депутатликка номзод учрашувда.

Маҳаллада яшовчи сайловчилар Экопартияни ва номзод дастурини тўла қўллаб-қувватлашди. Сайловларда партия ва унинг номзодларини танлаш истагида эканликларини билдиришди.