Халқ депутатлари Тахтакўпир тумани Кенгаши депутатлигига кўрсатилган номзод Б.Қалибаев иштирокида Тахтакўпир шаҳарчасидаги касб-ҳунар мактабида сайловчилар билан учрашув ўтказилди.

Экопартиянинг Сайловолди дастуридан ўрин олган энг муҳим жиҳатлар, жумладан, ёшлар ва аёлларнинг ҳақ-ҳуқуқларини ҳимоя қилиш ва ҳар томонлама қўллаб-қувватлаш борасида илгари сурилаётган ташаббуслар ҳақида сўз юритилди.

– Ҳар қандай давлат ва жамият тараққиёти бир қатор омиллар асосида юз беради. Бу жараёнда аёллар, уларнинг ижтимоий-сиёсий муносабатлардаги иштироки, ҳуқуқ ва эркинликларини амалда таъминлаш – давлатлар ривожининг муҳим индекси саналади. Зотан, аёл ва унинг жамият ҳаётидаги ўрни ҳамиша муҳим мезон бўлиб келган. Партиямиз хотин-қизларнинг таълим ва касбий кўникмалар олишлари, муносиб иш топишларига ҳар томонлама кўмаклашиш, тадбиркорлигини қўллаб-қувватлаш, ҳудудларда, айниқса, қишлоқларда хотин-қизларга кўрсатиладиган тиббий-ижтимоий хизматлар сифатини, улар ўртасида соғлом турмуш тарзини таъминлаш борасидаги ишлар самарадорлигини ошириш, турмуш ва меҳнат шароитларини яхшилаш, даромадларини кўпайтириш масалаларига алоҳида эътибор қаратади, – деди депутатликка номзод.

Сайловчилар, табиатсевар ёшлар Экопартияни қўллаб-қувватлашларини билдиришди.