Партиямиз ўзининг Сайловолди дастурида бир-биридан муҳим ва долзарб бўлган масалаларни келгуси беш йилликда амалга ошириш орқали ҳаётимиздаги кўпгина муаммоларга ечим топишни кўзлаяпти. Менинг назаримда бу жуда оқилона ёндашув деб ўйлайман.

Партиямиз экология соҳасидаги ҳуқуқ­бу­зарликлар учун жарималарни қайта кўриб чиқиш ва уларнинг миқдорини оширишни таклиф этмоқда. Кўп йиллик тарихимизда тупроқ, сув ва ҳавони ифлослантириш, ҳайвонларни калтаклаб заҳмат етказиш ва ўлдириш каби жиноятлар учун мулкий ва жисмоний жазо турлари белгиланган. Ҳатто ўта оғир жазолар ҳам қўлланилган. Бу инсонларнинг атроф-муҳит ва бошқа жонзотларга тўғри муносабатининг шаклланишига сабаб бўлган. Аждодларимиз қоида ва қонунларга қатъий амал қилиниши инсон ва табиат ўртасидаги муносабатни мувозанатда сақлаб туриш учун ўта муҳим деб ҳисоблашган.

Афсуски, босар-тусарини билмай, фақат ўз манфаатини ва бугунини кўзлаб ҳаракат қилувчи кимсалар бугунги кунимизда ҳам талайгина. Улар ўз ҳолича қолдирилса, нафақат ўсимлик ва ҳайвонот оламига, ҳатто ястаниб ётган чўллар, баланд тоғ ҳудудлари, она тупроғимиз, мусаффо сувимизга ҳам зиён етади. Бундай кимсаларга тушунтириш ва тарғибот ишларимиз наф бермаса, қонуний жавобгарлик ҳамда қатъий жазо чораларини қўллаш мақбул ечим бўла олади. Биз шу йўл билангина бугунги экотизимни келажак авлодлар учун соф ва барқарор ҳолда асраб қолишимиз мумкин.

Дастурда яна бир муҳим масала – 2030 йилга қадар пестицидлардан фойдаланиш ҳажмини 50 фоизга камайтириш ҳамда қишлоқ хўжалиги зараркунандаларига қарши курашишнинг биологик усулларидан фойдаланиш тизимини кенг жорий этиш кўзда тутилган.

Ўтмиш ота-боболаримизнинг деҳқончилик ишларига назар солсак, ўша даврларда лойдан солиниб эскирган уйларнинг кесаклари ва чириган маҳаллий гўнглар билан ерга ишлов бериш орқали экологик тоза маҳсулотлар етиштирилган. Тилёрар ширин қовунлар, мева ва сабзавотлар чет элларга экспорт қилиниб, катта даромад келтирган. Бугун мана шундай амалий анъаналаримиз йўқолиб, унутилиб кетишига асло йўл қўйиб бўлмайди. Дунёда экологик тоза маҳсулот истеъмолига бўлган талаб кундан-кунга ошиб, долзарблашиб бораётган бир пайтда маҳаллий шароитни инобатга олган ҳолда ўта заҳарли кимёвий моддалардан фойдаланиш амалиётини имкон қадар камайтириш озиқ-овқат хавфсизлигини таъминлашдаги муҳим қадам бўла олади.

Партиямизнинг бу галги Сайловолди дастури жонажон Ўзбекистонимизнинг ҳар томонлама гуллаб-яшнаши, табиатининг мафтункор ва мусаффо бўлиши ҳамда мамлакатимизда яшаётган миллати, ирқи ва динидан қатъи назар барча фуқароларга соғлом муҳит яратишга қаратилгани айни ҳақиқатдир.

Бугун эса она табиатимиз биздан, барча ҳазрати инсонлардан меҳр кутмоқда.

Улуғбек ИБРОҲИМОВ,

ЎЭП Боғот туман кенгаши раиси, халқ депутатлари Боғот туман Кенгаши депутати